مصطلحات هامة :
هنحاول في النقطة دي نتعرف على مصطلحات هتقابلنا كتير في السوق طبعا احنا هنتكلم عنهم بس ممكن نأجل الكلام عن كام مصطلح لوقتهم .
المصطلحات اللي هنتكلم عنهم انهاردة هي :
• مفهوم أزواج العملات
• النقطة ( البيب )
• الاسبريد
• الروافع المالية والهامش
• العقد ( اللوت )
-------------------------------
اول مفهوم معانا انهاردة هو :
• أزواج العملات :
يعني ايه أزواج العملات .. ؟ ومالك يا عم مصطفى داخل سخن علينا كده ليه ؟؟
ياعم لا سخن ولا حاجة بس خليك فايق معايا وانت هتعرف ان الكلام ده لعب عيال .
اولا انت لما بتروح السوق بتشتري طماطم اكيد بتدفع فلوس صح ؟؟
كده انت عملت زوج من غير ما تعرف .. ازاي ؟؟ هقولك انا ازاي انت لما اشتريت طماطم دفعت فلوس يعني لازم علشان تتم العملية دي لازم يكون في حاجتين .. اولا الفلوس اللي هتشتري بيها الطماطم اللي لو مكنتش معاك مكنتش هتنزل السوق من اساسه .. صح ؟؟ طيب وايه الحاجة التانية ..؟ الحاجة التانية هي : الطماطم اللي انت نازل تشتريها . لانك لو مش عاوز طماطم ومعاك فلوس هتنزل ليه السوق ؟؟ هتنزل تقول للناس انا معايا فلوس ؟ اكيد لأ طبعا ؟ يبقى انت دلوقتي عملت زوج اللي هو ( طماطم – فلوس ) .
في سوق الفوركس برضه هتشتغل خطبة وهتجوز العملات مع بعض .. يعني ايه ؟؟
يعني مثلا انت دلوقتي حبيت تروح تغير كام ريال سعودي من شركة الصرافة بجنيهات مصري هتروح تقول للراجل الصراف خد دي ريالات سعودي ... وهات جينهات مصري .. هتلاقي هي هي عملية الطماطم اللي فوق ان لازم علشان تتم العملية دي لازم يكون معاك ريالات سعودي .. ويكون في شركة الصرافة جينهات مصري .. صح ؟؟
طيب برضه يعني ايه زوج عملات وايه اللي هستفاده منه ؟؟؟
انا هقولك ببساطة مثال فعلي من سوق الفوركس :: هنفترض انك دلوقتي معاك 1000 دولار امريكي وحبيت انك تشتري يورو هتعمل ايه ؟؟ اكيد بتقول هروح لكشك عمو محمد بتاع العملات وهديله الدولارات وهاخد يوروهات .. صح ؟؟ ياخد عدوينك ان شاء الله ياعمونا ما انا قولتلك مفيش حاجة اسمها كشك عملات .. المهم ما علينا انت كده صح بس طبعا انت عاوز تعرف سعر اليورو مقابل الدولار كام صح ؟؟ طبعا انت هتدور على سعر صرف اليورو مقابل الدولار وهتلاقيه بغض النظر هتلاقيه فين انما هتلاقيه بالشكل ده :
EUR\USD = 1.3000
هو ده بقى شكل زوج العملة بتلاقي سعر عملة مقابل عملة تاني ..طيب ايه رأيك لو نوضح أكتر ..
لو مسكنا الزوج السابق ده وحبينا اننا نقطعة :
اولا حاجة هناخدها هي : EUR
وطبعا انت شطار وعارف ان ده رمز عملة اليورو وهنسميه هنا في الزوج اسم ( عملة الاساس ) .
تاني حاجة هي : USD
وطبعا برضه انت شاطر وعارف ان ده رمز عملة الدولار الامريكي وهنسميه هنا أسم ( عملة المقابلة ) .
طيب يعني ايه عملة اساس ويعني ايه عملة مقابلة ... ؟؟
عملة الاساس دي العملة اللي انت عاوز تشتريها وعلى فكرة مش شرط تكون يورو لأ ده مثال بس للتوضيح يعني ممكن يكون ( ين ياباني ) او ( دولار استرالي ) أو اي عملة تاني .. المهم عملة الاساس دي عاملة زي الطماطم اللي انت نازل تشتريها .
طيب وعملة المقابلة يعني ايه ... ؟؟
ايوه صح كده سامعك بتقول ان هي دي العملة اللي انت بتدفعها كمقابل علشان تاخد عملة الاساس .. فاكر انت طبعا لما اشتريت طماطم من السوق دفعت مقابلها فلوس صح ؟؟ اهو عملة المقابلة زي كده بالظبط .
طيب عرفنا عملة الاساس وعرفنا عملة المقابلة .. طيب سؤال صغير ايه الرقم اللي مكتوب بعد علامة ( =) ..؟؟
ده يا عمونا بيدل على سعر اليورو مقابل الدولار يعني ايه ؟؟ يعني علشان تاخد 1 يورو لازم تدفع 1.3000 دولار .
هنتكلم عن تاني مصطلح معانا ولكن في المشاركة القادمة