مدرسة الخاسرين المقدمة

[y4kezznium]

كلنا تعرفنا على الفوريكس ،، تاجرنا و خسرنا زعلنا كتير و فرحنا كان قليل كل مرة نخسر نعد ندور على شروحات للتحليل الفنى و مفيش فايدة برضه خسارة نسأل خبير عن نقاط الدخول و الخروج و أحياناً تصدق و أحياناً تفشل ،، لو مريت بالتجارب دى يبقى أنت أكيد مشاعرك سلبية تجاه الفوريكس و عندك أحساس كبير بالفشل و إنعدام ثقة فى إتخاذ القرار.

من هنا كانت مدرسة الخاسرين هدفها تعليم الخاسرين و تحويلهم إلى متاجرين فوريكس لديهم القدرة على صنع قرارهم بنفسهم سنبدأ واحدة واحدة و نطبق عملى بإذن الله بداية من تحديد الإتجاه الصحيح للشراء و حتى تحديد سعر البيع و الشراء و إدارة محفظة مالية.

تفتكروا نبدأ بالفابونتشى و لا الترند المكسور و من أول الدعوم و المقومات

يا عم بقى تانى حتدور على تحليل فنى

أكيد انا بتكلم بقى على التحليل الأساسى ،، يا عمنا انت مفيش فايدة فيك ،،

يا عم انت عرفت التحليل الفنى خلاص و كمان عندك معلومات عن التحليل الأساسى الموضوع مش كيميا ،، تفتكر لو انت أتخرجت من كلية الطب تقدر تبقى دكتور و تفتح عيادة ناجحة طبعاً لأ طب لو أتخرجت من هندسة تقدر تبنى عمارة على و تختار مواد البناء و تكسب على طول طبعاً لأ.

لأن لو أنت مهندس أو دكتور لازم تشتغل عند حد يديك خبرته الأول و و مع الشغل حتفهم حاجات مالهاش دعوة بفنيات مجالك لكن ليها دعوة بإدارة حرفتك و إدارة الحرفة دى أهم حاجة بتفرق ما بين منشأة ناجحة و آخرى فاشلة. و هو دا اللى نقصك يا معلم

حنتعلم إزاى نفكر بره الصندوق شوية و إيه العوامل الحقيقية للخسارة و إزاى تحدد اسباب خسارتك ،، نتعلم إزاى ندرس السوق و إزاى (و دا المهم) تاخد قرار فى السوق ،، تتصرف إزاى لما تخسر مش بس بالهيدجنج لكن هناك حاجات تانية المفروض تعملها و إزاى توظف كل دا مع التحليل الفنى و الأساسى و إزاى تدير أموالك بنجاح.

من الآخر احنا مش حنتعلم فنيات الفوريكس و خباياه و لكن حنتعلم إزاى نفكر بره الصندوق عشان نصنع متاجر فوريكس ناجح.

[y4kezznium]

الدرس الأول
سوق الفوريكس الذى لا تعرفه

الفوريكس هو سوق المتاجرة على العملات ،، معنى كده ان الفوركس أولاً و أخيراً هو سوق و دى حقيقة يغفلها الكثيرين من متاجرى الفوركس إما لقصر نظر أو سوء تقدير أو عدم الإهتمام بهذه التفاصيل التى تبدو نظرية من وجهة نظر المتاجر ،، بصراحة التفاصيل دى مملة شوية و لا تعطى نتائج مباشرة تعطى مؤشرات على الشارت و عشان كده فالجميع ينظر لهذه التفاصيل كشىء ثانوى تأخذ فى الإعتبار لكن بشكل ثانوى ،، لكن المهم هو الحركة على الأرض و الشارت و كل عناصر التحليل الفنى المختلفة.


عدم إهتمام المتاجر ببعض التفاصيل التى تبدو نظرية بعض الشىء هي السبب فى خسارة أغلب المتاجرين بجانب الطمع برضه فالكل يدخل الفوريكس من أجل تحقيق مكسب كبير فى فترة قصيرة لكن بدون تعب او مجهود ،، أغلب المتاجرين يخسرون بسبب إعتمادهم على التحليلات سواء فنية أو أساسية أو حتى الكوت و يتناسوا ان الفوركس فى الأول و الآخر سوق ،، الجميع يظل يراقب حركة السعر و ينسى حركة السوق.


الموضوع مش سعر وصل لفيبو 61 أو كسر ترند أو نموذج سعرى و لا حتى خبر طلع غير إتجاه السعر أو أكد إتجاه حتى السعر ذات نفسه فى وجهة نظرى مجرد مؤشر زيه زى الموفينج أفريدج بالظبط لا يختلف عنه كثيراً. و لتوضيح وجهة نظرى بشكل أعمق ،، فالسعر الذى نتعامل معه جميعاً مجرد مؤشر لحركة سوق فيها من يربح و فيها من يخسر و بالتأكيد الأثنين يتاجرون داخل سوق واحد و هو سوق تداولات العملات المسمى بالفوركس.


و الفوركس كأى سوق توجد فيه أدوات سيطرة و كيانات مسيطرة و آليات تنظيمية بالظبط زى اللى بيحصل فى مصر من أول وكالة البلح حتى تجارة الحديد أو حتى كروت الشحن كله بيخضع لنفس الآليات ،، لكن لأن الفوركس سوق للعملات فالسيولة النقدية هى مفتاح السيطرة فى الفوركس فلا معنى ان تملك كثيراً من العقارت بملايين و لا تملك سيولة تكفى لسد أحتياجاتك و نقدر نلاحظ ان ارتفاع قيمة الدولار لا يعكس قوة للأقتصاد الأمريكى اللى بيعانى مشاكل كتير ،، ولكن قيمته ترتفع أمام العملات الآخرى و بالتالى الأرتفاع ليس بسبب قوة للأقتصاد الأمريكى لكن بفعل المضاربة على السعر و حركة السوق اللى فيها بيع و شراء و تحالفات لها أهدافها و مصالحها فى توجيه السعر فى إتجاه معين.



و من هنا نقدر نقول ان المسيطر على سوق الفوركس هو من يملك السيولة النقدية لأنه بهذه السيولة سيمتلك قوة شرائية قادرة على توجيه السعر فى الإتجاه الذى يرى فى مصلحته فلو مصلحته فى الإنخفاض يسحب السيولة و لو فى الأرتفاع يضخها فى السوق.
لذلك يبقى السعر مؤشراً ليس لصعود أو هبوط عملة بقدر ما يكون مؤشراً للحركة التى يشكلها الكيان المسيطر فى السوق لتوجيه السيولة النقدية فى إتجاه معين تحقق مصلحته. لذلك أهم شىء لتحقيق مكسب فى الفوريك ليس التحليل الفنى و لكن تحديد الفئة المسيطرة فى السوق و دوافعها و أسباب توجيه السعر فى إتجاه معين.


هنا نيجى للسؤال المهم ، من هم الكيانات العاملة فى سوق الفوركس ؟

الدرس التالى إنشاء الله عشان انا داخل أنام بصراحة

[معاذ عودات]

اهلا يا غالي ،،
مواضيعك دائما جميله وتعليميه
بالزبط مثل ما تكلمت الفوركس تحتاج الى خبره كأي تخصص بالدنيا
الطب ، الهندسه ، التجاره ...ألخ
الواحد يدرس الكتب ويحضر الفيديوهات ولكن يجب عليه الخبره والتعلم من الاخرين
وان يطبق ما تعلمه
تحياتي يا غالي

[أحمد الرويني]

درس مفيد و رائع يا ريس منتظرين بقية الشرح

متابعين يا غالي ،،،،،،،،

[y4kezznium]

صباح الخير عليكو يا رجالة
درس مفيد و رائع يا ريس منتظرين بقية الشرح

متابعين يا غالي ،،،،،،،،

روينى باشا متشكر جداً على الثقة دى يا رب يكون كلامى كله عن حسن الظن

اهلا يا غالي ،،
مواضيعك دائما جميله وتعليميه
بالزبط مثل ما تكلمت الفوركس تحتاج الى خبره كأي تخصص بالدنيا
الطب ، الهندسه ، التجاره ...ألخ
الواحد يدرس الكتب ويحضر الفيديوهات ولكن يجب عليه الخبره والتعلم من الاخرين
وان يطبق ما تعلمه
تحياتي يا غالي



تسلم يا معاذ و مواضيعى جميلة عشان دا أصلاً منتدى رائع و بيقدم مساعدات قيمة للمتاجرين أكيد لما أدخل و ألاقى الناس بالروح دى يبقى عيب عليا انى ابخل عليهم بمعلومة أعرفها رغم انى أصلاً فى كل كافة النقاشات التى كنت بادخلها كنت أقيس وجهات نظر الناس و موقفهم و مكنتش بقول ليه و إيه بس لما أدخل منتدى آلاقى كل حاجة عن الفوريكس يبقى أكيد حبقى أنانى لو مفدتش الناس و مشرحتش طريقة أساسية (انا مش خبير فوريكس بس تقدر تقول منظم و أى معلومة صغيرة عندى مهمة و لازم يبقى ليها فايدة عشان كده بطبع كل التقارير و أحطها فى ملف و أراجعها من وقت للآخر حتى أقدر أصنع قرار سليم فى الآخر) و هو دا هدف المدرسة.

عندى بس مشكلة بسيطة انا عايز حد يوجهنى لطريقة أقدر أعمل بيها شروحات فيديو عشان دى حتفرق كتير فى الشرح خصوصاً عند التطبيق العملى و كمان أزاى أشرح على صورة حد يقدر يدلنى على برامج معينة أقدر أستخدمها

[alshreef2011]

ماشاء الله شرح مميز ودروس روعه
تسجيل متابعه فى اول الصف

[husseney]

احلى لايك
واحجز مكانى فى الصف الاول جمب رشااد باشا

[ahmed younes]

موضوع جميل والله يا محمد .. واجمل ما فى الموضوع انك بتنظر للسوق بنظرة مختلفة ..

متابع معاك انشاء الله ..

[ForexEgyptian]

موضوع هام جداااا الي الامام