لأ مافيش داعي أبدا للقلق
وطبعا هتعرف قبل فتح الحساب إذا كان الفرع هيفعلها على طول ولا لأ
والطبيعي إنه يفعلها عند استخراجها حسب رغبتك
بالنسبة بقى للمعاملة فهي المفروض طبعا تكون واحدة في جميع الفروع
بس اوقات بتلاقي بعض الفروع بتتصرف من نفسها وده في جميع البنوك
زي المعاملات الائتمانية
والحد الأدنى لفتح الحساب
وهكذا
بس من حقك كعميل إنك تفرض على الفرع سياسة البنك
إذا حب الموظفين في الفرع إنهم يستهبلوا أو يقصروا في تقديم خدمة معينة
وهقولك على موقف حصل معايا
رحت أفتح حساب في بنك NSGB
وفي حساب أسمه توفير بلس تقدر تفتحه بأي مبلغ حتى لو جنية واحد
لما طلبت افتح الحساب الموظفة قالتلي الحد الادنى 500 جنية
قولتلها لأ مافيش حد ادنى واقدر افتح حساب بجنية واحد
لقيتها اندهشت وقالت مافيش حاجة زي كده ومين اللي قالك كده
قولتلها لأ أنا مابجيبش كلام من عندي والبنك هو اللي قاللي كده
فقالتلي بسخرية روح خلي البنك يفتحلك حساب بجنية
رحت متصل على الكول سنتر وسألتهم ممكن أفتح حساب توفير بأي مبلغ
قالولي اه يا فندم ..سألتهم تاني يعني أقدر افتح حساب حتى لو بجنية واحد
قالولي أه طبعا زي ما أنت عايز
قولتلهم الفرع اللي انا فيه مش راضيين يفتحولي الحساب وبيقولوا مافيش حاجة زي كده
فقالوا ازاي يعني أيه سبب رفضهم قولتلهم مش عارف
المهم أخدوا أسمي وبيانات عني وراحوا متصلين على الفرع وفهموهم إني أقدر افتح حساب بأي مبلغ بدءا من جنية واحد
وبعتولهم طلب بأسمي لفتح حساب
علشان كده دايما بقول في فرق بين البنك (اللي بيوفرلك خدمات من حقك تستفيد بيها) وبين الموظفين اللي شغالين في البنك
فأنت ماتقلقش من أي حاجة خالص
عموما بنك بلوم مصر وبنك بيريوس مصر الاتنين ممتازين
والبنكين تم الايداع بواسطة الديبت كارد بتاعتهم الأيام دي
من قبل أكثر من عضو هنا في المنتدى
تحياتي لك وبالتوفيق إن شاء الله