الديمو مش عيب ،،
اهلا بيكم في لقاء جديد معانا النهاردة واللي هنتكلم فيه بشكل موجز عن الحساب الديمو ,,,
ناس كتيــــــــــــــر جدا بتعتبر ان الحساب الديمو ده لعبة أو حاجة ملهاش قيمة .. وناس تقولك ان العامل النفسي بيفرق جامد لما بتشتغل على حساب حقيقي ..
انا طبعا مش بنكر ان العامل النفسي بيفرق جامد وده تقريبا السبب الرئيسي أن كتير مننا بيكسب مكاسب هايلة جدا على الحساب الديمو انما على الحقيقي بلاش ندور
وتيجي في المسابقات الشهرية تلاقي الواحد عامل 400% على حسابه واول لما يكسب الجايزة تلاقيه خسر حسابة في اقل من اسبوع .. طيب ليه السبب ؟!!!
السبب يا سادة هو " الاستهتار "
ايوه هو " الاستهتار "
طيب ازاي يعني يا مصطفى ؟؟؟!!!!
انا اقولك بس الاول رد عليا
بتعمل كام حساب ديمو في الشهر ؟!! في ناس هتقولي : كتيــــــــــــــر
طيب هل بتستمر على نفس الحساب اكتر من اسبوع ؟؟!! في ناس هتقولي : لأ انا كل لما اشوف استراتيجية اقول خلاص هعمل حساب جديد وهكمل عليه ... وبعدها بكام يوم تلاقيه عمل حساب تاني ونسي الاول وكأنه لم يكن .. وهكذا ،،،
طيب تعرفوا انا هقولكم ايه فايدة الحساب الديمو .. وليه الناس معظمها بتكسب على الديمو بتخسر على الحقيقي بعيدا عن العامل النفسي ..
فايدة الحساب الديمو من وجهة نظري هو انك تستمر في إدارة حساب فترة معينة (شهر مثلا) .. يعني شهر مش بتشتغل غير على حساب واحد ومش بتدخل صفقات غير على حساب واحد علشان اخر الشهر تشوف انت نتايجك ايه خلال الشهر ده ... هل فعلا كسبان ولا خسران طيب وتسأل نفسك لو خسران انا خسرت ليه ومش عيب انك تمسك سجل الصفقات وتراجع على صفقة صفقة وتراجع على سبب دخولك ليها وتشوف انت غلطت في ايه وتصلح من غلطك .. ومش عيب انك تشتغل شهر تاني على الديمو علشان تتأكد انك فعلا بتتحسن وساعتها صدقني هتكون فعلا قادر على إدارة حساب حقيقي .. إنما كل يوم والتاني تعمل حساب ديمو يبقى للاسف مش هتتعلم الادارة المالية لحساب لفترة طويلة .. وعلى فكرة الكلام اللي فات كتير مرة بية وانا منهم كنت كل يومين اعمل حساب ديمو ولما احس نفسي خسرت اول صفقة او اول صفقتين اغير الحساب واعمل واحد جديد .. علشان كده انا عرفت بعد كده ان الفايدة مش مجرد اني بدخل صفقات وجرب طريقة دخول وخلاص لأ الفايدة كمان في انك تستمر في إدارة حساب لمدة طويلة ..
تحياتي وإلى اللقاء في خاطرة آخرى
دعواتكم
" لا تنسى إذا اعجبتك الخاطرة اضغط على زر like اسفل المشاركة "