اللهو الخفي
السلام عليكم ورحمة الله وبركاتة
أخواني الأعزاء أعضاء منتى أف أكس أريبياانا حابب أشارككم بحاجة أنا أختبرتها .. ممكن متكونش تعليمية .. لكنها توعيه لكل من لديه السؤال الرهيب
هو اليه احقق ارباح عالية في الحساب التجريبي ... واول حساب افتحه يتصفر!!!!؟
انا أولكم يا شباب ... درست الفوركس واتفرجت على المكتبه الخاصة بتعليم الفوركس ... وقفت لغاية التحليل الفني والشموع اليبانية ... وعملت نفسي بطل ومغوال وكأني محترف فوركس وحاسيت خلاص اني همسك الميتا تريدر همسح بيه سوق الفوركس .. وكاني خلاص بقيت علامة في الترندات والدعوم والمقومات والشموع وبفهم يعني ايه بولينجار باند ويعني ايه موفينجات
خلاص الواد بقى صايع فوركس
وقررت أفتح حساب تجريبي علشان اشوف نفسي بقى
وياسلام أبدأ تاتا تاتا في الاول بلوتات ماكرو ..... والاقي نفسي بجيب ارباح ياسلام ... بس ببقى عامل زي الحرامي ... سعني ممكن ادخل صفقة بـ 10 سنت وعمل بتاع 10 نقط او 8 نقط وأقفلها
ومرة على مره على مره الاقي نفسي بقيت واد خلاصه .... والدولار على الدولار عمل 100 مافيش 50 صفقة وبدأت ازود اللوت .. وأحقق أرباح عاليه
وأقول ايه بقى .. انا هفتح حساب صغير تجريبي وكأنه الحقيقي .. وافتح الحساب 1000 دولار بس .. واشوف انا هعمل ايه!
واشتغل على الحساب .. بلوتات مايكرو ...0.01
وحبه حبه ... ازود اللوت شوية 0.02 - 0.04 - 0.05 لغاية ما قلبي يموت بقى وأقوم عاملة 0.10
والسوق يشيلني ويهبدني .. واعملي بتاع 50 دولار ربح .. وارجع تاني للوتات الصغيرة ... علشان اقول ايه اني قنوع يعني .... الالقي البلية شغالة حلو
ابدأ بقى بقلب شديد واقول ايه انا هدخخل سونجات واقوم عامل صفقة بدولار وابيتها بقى وعيش الحياة ... الالقيها عاملة 3 دولار موجب واقول الشغل حلو وابيت وابيت وابيت
وأروح انام على ما أصحي الصبح الاقي الصفقة بقت -20 دولار اقول ايه ده طيب لما اخليني وراها لما اشوف اخرتها ايه ....
وكأني بعاند في السوق ... وعلشان اغيظ السوق بقى ,اصبر نفسي اقوم داخل تعزيز بلوت اكبر من الدولار .. زي ما أكون بتزاكى مع نفسي .. والواد بقى قلبه مات خلاص ...
وفي الاخر اخر ما أزهق بقى .. اقوم قافل الصفقة بالخسارة ...
وعشان الواد يعمل ريسيت للحساب ...... ويرجع الخسارة بسرعة .. اقوم العب شوية على الذهب ... كام خبطة كده ارجع اللي خسرته واشتغل تاني
لغاية وما هبلي يكرمني والحساب بدل 1000 دولار يبقى 2000 و 30000
الواد مبقاش صغير خلاص ... يالا يا واد دوس في الحقيقي وافتح حساب ودووووووووووووس
ونفتح الحساب الحقيقي .............
ومن هنا ... تنزل المنصة ... وتفتح وتدخل الحساب .. وتشوف المبلغ قدامك 1000 دولار ... تقعد قدام الجهاز ساعتين مش عارف تعمل ايه
وكأن السبع اللي كان موجود الصبح جيه عليه الليل وبقى قطة
تفتح الصفقة بـ لوت 0.01 .. وتقول ده لو فيه اقل من كده كنت فتحت .. وتفضل قدام المنصه عنيك متغمضش
ولو جيبت 4 نقط موجب .. تقفل الصفقة وش ...
وفجأه ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ اللهو الخفي يبدأ يلعب لعبه بقى
وتفوجئ ان الصفقة بتقفل بنقطة ونقطتين مش الخمس ولا الست نقط اللي انت ناويت تقفل عليهم .... وساعات تبقى موجب .. على متقفل تكون سالب
وده لأن في التجريبي انت بتتعامل مع السيرفر الموجود في الشركة ... يعني الامر بيتنفذ ممكن في لحظتها ... لكن في الحقيقي .. انت الامر بيروح للشركة |شركة الوساطة| وبعدين من السيرفر بتاع الشركة يروح للبنك طبعاً العملية ممكن تاخد من 3 الي 4 ثواني ... فيها السوق ممكن يقلب قلبه زي الزفت
ده ناهيك عن اللهو الخفي الأصعب من كل ده ....
اللهو الخفي اللي بيدخل جوا دماغك .... ويخليك قاعد على أعصابك ... وتبقى شايف الصفقة +5 نقط ... تيجي تقفل الصفقة .. اللهو الطماع يقولك استني شوية يمكن تطلع 6 .. وتيجي ال6 تقول خليها 7 وعلى ما تقرر تقفلها على 8 وتدوس إغلاق الصفقة تلاقي جاري التنفيذ .. ومع السلامة يا حبيبي قلبي تفوجئ انك قفلتها على +1 ولا +2 .. مجبتش حقة قرص الصداع اللي انت هتشتريه بسبب الضغط اللي انت كنت فيه . .... ويااااه بقى لو قفلت على السالب هههههههههههه
انت ممكن تططب ساكت
أمال فين السبع اللي كان شغال على الديمو
ههههه .. كان زمان وجبر .... حبتين تلاقي نفسك ال1000 دولار بقوا 950 دولار ... ينهار أبيضانا خسرت 50 دولار .. يعني 300 جنيه ايه ده ايه ده ... لا ياعم انا مش هشتغل على الحقيقي دلوقتي
أنا ههاخد اجازة شوية وبعدين أكمل بس لما اتجرء شوية على السوء وافهم اكتر ..... (((( وكان فين الكلام ده وانت كنت شغال على الحساب التجريبي )))))
مهي هنا المصيبه
المشكلة ان الواحد يشتغل على الحساب التجريبي ... وبيعمل غلطات وبيكون ادارة رأس ماله مش مظبوطة ... وللأسف ميعرفش ان اللي بيعمله على النسخة التجريبية .. هو اللي هينفذه من غير ما ياخد باله على الحقيقي ... وفي الاخر يجيب الغلط على الفوركس ... ويعاتب على اللهو الخفي اللي اسمه الخسارة
انا كنت واحد من الللي كنت بتكلم عليهم فوق ده .. بس بدل ما صفرة حساب بـ 1000 دولار .. لا انا كنت واعي شوية
صفرت حساب بـ 100 دولار ....
محترمتش ادارة راس مالي .... ودخلت بلوتات عالية طمعاً في اني اعوض الخسارة .. لدرجة اني دخلت بلوت واحد دولار للنقطة ... من غير ما اعمل حساب انا عندي كام دولار اصلاً
مقدرتش الضغط العصبي عليا وانا بتعامل مع الحساب الحقيقي
كنت بقعد فكري مشلول وانا بشتغل .. حاسس اني مش قادر اخد القرار .. وللأسف الجأ لتوصيات غيري ...
طيب هو انا فاتح الحساب علشان اخد توصيات غيري؟؟؟
ولما اخسر .. انام افكر في الخسارة
طيب والحل
الحل انك متدخلش بلوتات كبيرة أبدأً مهما افتكرت نفسك كبير
ولو انت صايع في الفوركس خليك 0.03 للوت الواحد ... ومتتعمالش على زوج واحد من العملات
خليك على زوجين .. علشان لو واحد خسر التاني يعوض
وأبعد عن الأزواج التوائم .... يعني في ازواج تلاقي زي بعضها .. حتي الشارت ممكن تلاقيه شبه بعضه .. متدخلش عليهم هما الاتنيي ززي اليورو/دولار والباوند/دولار
انا بعتبرهم توأم معفن
المهم .. متفتكرش ابدأ أن الحساب الحقيقي ..... زي الحساب الديمو ....
مافيش اي وجه مقارنة
مستحييييييييييييييييييييييييييييل تقدر تحقق 100% ارباح في وقت قصير
واحد بس هو اللي يقدر يعمل كده .... (الطماع) والطماع اللي عمله في يومين هيضيعه في ساعتين
واياكم والذهب
الذهب بقى ... هو يعتبر ملاك الموت في سوق الفوركس ... اولا بياخد مارجن يقطم وسط حسابك يعني لو حسابك يادوب بيتنفس .. وفتحت صفقة ذهب .. هتجيلك كرشة نفس وممكن تروح فيها ... وقرصته والقبر ... لإما ترفعك لفوق لإما توديك سابع أرضومتخليش غضبك .... يسيطر عليك ... ومتعاندش السوق ... ومتفتكرش انك لما تعزز انت بتعاند مع السوق علشان ينزلك .. قبل ما تفتح صفقة التعزيز شوف السوق شوف الاخبار حلل كويس علشان تعرف اذا كنت هتعزز ولا هتقفل على الحخسارة..
أنا نقلت ليكم خبرتي اللي كلفتني 100 دولار ... علشان تحاولوا تتجنبوا الأخطاء اللي انا اندلقت فيها
والمشكلة .. اني كنت عارف الملاحظات اللي انا وقعت فيها وجابت أجلي .. لكن ... للأسف\
اللهو الخفي ملهوش كبير ... دا لغاية دلوقتي عمالين يبحثوا عنه في مصر ... ومش هيلاقوه ....
انا بالنسبالي اللهو الخفي اللي كان بيحاربني طول فتره مداولتي على الحساب الحقيقي ...
كان (((أنا)))
أتمنى أكون فدتكم ... ومكنش صدعتلكم دماغكم
تحياتي
.gif)
.gif)
